So honkar chibvipalikerel?

Nacionalpht chibcentri nashta butiket kerela ta stimulirar to vasdid ismarelad attjer dolle nacionallipha haripats chiben an sarinipet, dumadela ninna sejdsanip, angledsaj metodir gla te soraloa ulavdoas pakjalapa te ismarela ta palile chiben hem spreddra dsanip bási palikerel.

Menget ninna te kerela jikk chib sav kava nast jiddra odore andri an glanesketjiron karas chibpalikerel. Palikerelen attjer dolle nacionallipha haripats chiben dinglar bási te helko palile ta angledsaj chiben preal najek tipir attjer dsandoa kerakepar. Kava durihutnoa resinen ninna kerakerna honkar te vasdi ismareladen attjer chiben helko pre individi ucip ta an sarinipet an barot hem te kerela jeck tjivinarnde prealanglot attjer dolle nacionallipha haripats chiben ta kultura[1] to avela kustick.

Soske nast jikk chib tatisphar te nasavdo?

Soskipen to te jikk haripatschib honkar trachet ta tatisphar te nasavdo honkar butvar jeck duri tjiro attjer butike asimiliriphing savi rodra to jeck baripade chibparraprocesi. Chibparraprocesin andriker te rakkrar attjer jikk chib bekksikk prealjar to te ismerela jikk vavoret chib. An jeck chibparraprocesi ismarelas chibet an sast kuttir baripar an najek viavahari, savit sav hari polo hari, ingarela to te rotepat nani duriar ingarelas fann dad ta dagria to núckor.

Chijber gla to magra ta tjujalin chibparraprocesin

Jeck chibparraproceci kammar siro phuv an búttar najek paramisiska ta sarinikano sarti ta adhinela tji pre indinigan butike chibsimali. Chibvipalikerel dinglar maskar vavoret bási te angledsaj halati ta metodir gla te vasdi genjet, dumoja chibprealkhedipen prele kusticker ta usipa tergen pre chibet. Jeck barot kota an polikerelsprocesin honkar odore te dumoja rakkrar te ovel rahatia an te ismarela chibet an najek viavahari.

Vrivoltasnuktar gla palikererel attjer dolle nacionallipha haripats chiben

Dolle nacionallipha haripats chiben kammar najek vrivoltasnuktar gla chibvipalikerel ta najek zori so chanir chijber. Jeck shinavibe attjer akanathant, kava mangela pucka, attjer sako jikk chib arakherp siri an chibparraprocesi ta savia faktorir savo prekerepar ismarelade attjer chibet, saste pacha to phuv gla palikerel chijber ta – kerakepar. Jekvaktigt honkar phuv vriaschan dovasavriga gla sarine nacionallipha haripats chiben, sassko kava caceta te chibbajtiprocesi kerad te chibens prealjidran an Svedijo honkar trachad.

[1] Vakrin kultura an dova haljovipa ismarels butvar gla tipikano ikeripe, purankeripha ta kultúramangin, ingarela malepha, maskarrunoa vartan ta ideali, ta sutt savo sumnalen haljovelas, ta furstes. Kultúrar honkar paramisiskt formadit, básifúrslig ta socijalit buroar barabariper.